ကမ္ဘာ့ဘဏ် ထောက်ပံ့ကြေး ပြန်စပေး

ဖွံ့ဖြိုးရေး အစီအစဉ်များဖြစ်သော ကျောင်း၊ လမ်း၊ သောက်သုံး ရေနှင့် အခြား စီမံကိန်းများအတွက် အမေရိကန်ဒေါ်လာ ၈၅ သန်းကို ပေးရန် လျာထားကြောင်း ကမ္ဘာ့ဘဏ်က ထုတ်ပြန်သည် (ဓာတ်ပုံ- Reuters)

မြန်မာ့ ပြုပြင်ပြောင်းလဲရေးကို အားပေးသည့်အနေဖြင့် ကမ္ဘာ့ဘဏ်အဖွဲ့ (World Bank Group) က မြန်မာနိုင်ငံတွင် ရုံးခန်းသစ်တခုကို ဖွင့်လှစ်ပြီး ထောက်ပံ့ငွေများ ပြန်လည်ပေးရန် ယနေ့ သြဂုတ်လ ၁ ရက်နေ့တွင် ကြေညာထုတ်ပြန်သည်။
ဖွံ့ဖြိုး ရေး အစီအစဉ်များဖြစ်သော ကျောင်း၊ လမ်း၊ သောက်သုံး ရေနှင့် အခြား စီမံကိန်းများအတွက် အမေရိကန်ဒေါ်လာ ၈၅ သန်းကို ပေးရန် လျာထားကြောင်း ကမ္ဘာ့ဘဏ်၏ ကြေညာချက်ကဆိုသည်။ ထောက်ပံ့ငွေသည် နယ်စပ်ရှိ ပဋိပက္ခဖြစ်နေသော ဒေသရှိ စီမံကိန်းများမှသည် နိုင်ငံလုံးဆိုင်ရာ အဖွဲ့အစည်းများ၏ ဖွံ့ဖြိုးရေးအစီအစဉ်များထိ အထောက်အပံ့ဖြစ်မည်။
ကမ္ဘာ့ဘဏ်အဖွဲ့ (World Bank Group ) ဆိုသည်မှာ ယေဘုယျအားဖြင့် ဆင်းရဲသည့်နိုင်ငံများကို ကြွေးမြီများ ချေး ငှားပေးနေသည့် နိုင်ငံတကာအဖွဲ့ ၅ ခုပေါင်းထားသည့် အဖွဲ့ဖြစ်သည်။ ယင်းမှာ ဖွံ့ဖြိုးတိုးတက်ရေးနှင့် ပြန်လည်တည်ဆောက်ရေး နိုင်ငံတကာ ဘဏ် – International Bank for Reconstruction and Development (IBRD)၊ နိုင်ငံတကာ ဖွံ့ဖြိုးတိုးတက်ရေး အသင်း- International Development Association (IDA)၊ နိုင်ငံတကာ ဘဏ္ဍာငွေကြေး ပူးပေါင်းဆောင်ရွက်ရေး အဖွဲ့- International Finance Corporation (IFC)၊ နိုင်ငံစုံ ရင်းနှီးမြှုပ်နှံမှု အာမခံ အေဂျင်စီ- Multilateral Investment Guarantee Agency ( MIGA) နှင့် ရင်းနှီးမြှုပ်နှံမှုဆိုင်ရာ အငြင်းပွားမှု ဖြေရှင်းပေးရေး နိုင်ငံတကာဌာန- International Centre for Settlement of Investment Disputes ( ICSID) တို့ ဖြစ်သည်။
ရုံးခန်းသစ်ဖွင့်လှစ်ရန် မြန်မာပြည်လာရောက်ခဲ့သော ကမ္ဘာ့ဘဏ်အဖွဲ့ ဒု-ဥက္ကဌ မစ္စ ပါမီလာကော့စ်က ထောက်ပံ့ကြေး ပြန်ပေးခြင်းနှင့် ပတ်သက်၍ “မြန်မာဟာ ဒေသတွင်းမှာ အဆင်းရဲ့ဆုံး နိုင်ငံတွေထဲမှာပါဝင်နေတယ်။ ပြည်သူတွေရဲ့ လိုအပ်မှုတွေက အရမ်းမြင့်မား တယ်။ ဒါကြောင့် ကမ္ဘာ့ဘဏ်ကလည်း အစိုးရရဲ့ ပြုပြင်ပြောင်းလဲရေးကို ထောက်ပံ့အားပေးဖို့ တွဲဖက်လုပ်ကိုင် သူတွေနဲ့ အကောင်အထည်ဖော်နေပါတယ်။ ဒါမှလည်း ပြည်သူ့ဘ၀တွေ တိုးတက်လာမှာပါ။ အထူးသဖြင့်တော့ ဆင်းရဲချို့တဲ့နေတဲ့သူတွေပေါ့” ဟု ပြောသည်။
ကမ္ဘာ့ဘဏ်အဖွဲ့သည် နေပြည်တော်တွင် သမ္မတ ဦးသိန်းစိန် ဦးဆောင်သော မြန်မာအစိုးရအဖွဲ့နှင့်လည်း တွေ့ဆုံဆွေးနွေးခဲ့ပြီး အတိုက်အခံ ခေါင်းဆောင် ဒေါ်အောင်ဆန်းစုကြည် အပါအ၀င် လွှတ်တော် ကိုယ်စားလှယ်တချို့နှင့်လည်း တွေ့ဆုံခဲ့ကာ မြန်မာနိုင်ငံကို ကမ္ဘာ့ဘဏ်နှင့် ပြန်လည် ချိတ်ဆက်လုပ်ဆောင်နိုင်ရန် နည်းလမ်း ရှာဖွေမှုများနှင့်ပတ်သက်၍ ဆွေးနွေးခဲ့ကြသည်။ အဆိုပါ ခရီးစဉ်မှာ မြန်မာနိုင်ငံတွင် ပြုပြင်ပြောင်းလဲရေးလုပ်ဆောင်လာပြီးနောက် ကမ္ဘာ့ဘဏ် ထိပ်တန်းခေါင်းဆောင်များ၏ ပထမဆုံးလည်းဖြစ်သည်။
မြန်မာနိုင်ငံအနေဖြင့် ကမ္ဘာ့ဘဏ်ကို  ပေးရန်ကျန်နေသော အကြွေး အမေရိကန် ဒေါ်လာ ၃၉၇ သန်း ချေးငွေ စာရင်းရှင်းရန်နှင့် အတိုးနှုန်းမဲ့ ချေးငွေ ပြန်ရရေး ရှေ့နှစ် ဇန်နဝါရီလတွင် ဆက်လက်ဆွေးနွေးမည်ဟု မစ္စ ပါမီလာကော့စ်က ရန်ကုန်ရုံးသစ်ဖွင့်ပွဲတွင် ပြောဆိုသည်။ “ဒီကိစ္စတွေကို ကျမတို့ အာရှဖွံ့ဖြိုးရေးဘဏ်နဲ့ ပူးပေါင်းဆောင်ရွက်ဖို့ ရှိပါတယ်” ဟု ပါမီလာကော့စ်က ပြောသည်။
မြန်မာက အာရှဖွံ့ဖြိုးရေးဘဏ်ကို ပေးရန် အကြွေး ဒေါ်လာ သန်း ၅၀၀ နီးပါးရှိသေးသည်။ အာရှဖွံ့ဖြိုးရေးဘဏ်ကလည်း ရန်ကုန်တွင် ယခု ရုံးခန်း ဖွင့်ထားပြီဖြစ်သည်။
မြန်မာနိုင်ငံတွင်း ၀န်ထမ်းများကို ဦးဆောင်ရန်အတွက် ကမ္ဘာ့ဘဏ်က မြန်မာနိုင်ငံဆိုင်ရာ မန်နေဂျာအဖြစ် မစ္စတာ ကန်သန်ရှန်ကာကို ခန့်အပ်ခဲ့သည်။ ၄င်းသည် ဂါဇာ၊ အရှေ့တိမော၊ ကိုဆိုဗို စသည့် ပဋိပက္ခနှင့် ပဋိပက္ခလွန် ဒေသများတွင် လုပ်သက် ၁၅ နှစ်ကျော် ရှိသည်။
ထို့အပြင် မစ္စတာ ချားလ်စ်ရှနိုက်ဒါကိုလည်း IFC ၏ မြန်မာနိုင်ငံဆိုင်ရာ ကိုယ်စားလှယ်အဖြစ် ခန့်အပ်ခဲ့သည်။ သူသည် ဗီယက်နမ်၊ လာအို၊ ကမ္ဘောဒီးယား နိုင်ငံစသည့် အရှေ့တောင်အာရှဒေသတွင် ပုဂ္ဂလိက ကဏ္ဍဆိုင်ရာ လုပ်သက် ၁၅ နှစ် လုပ်ငန်းအတွေ့ အကြုံ ရှိသည်။
မြန်မာနိုင်ငံသည် ၁၉၅၂ ခုနှစ်တွင် ကမ္ဘာ့ဘဏ် အဖွဲ့ဝင်နိုင်ငံ တနိုင်ငံဖြစ်လာခဲ့ပြီး ၁၉၈၇ ခုနှစ်ကတည်းက ဘဏ်က ချေးငွေအသစ် မပေးတော့ပေ။ မြန်မာအစိုးရက ကြွေးကျန် ရှိသော်လည်း အဖွဲ့ဝင် အဖြစ် ဆက်လက် ရှိနေဆဲဖြစ်သည်။